थोर युवा नेत्या पूनमताई महाजन


ज्यांच्या चेहऱ्याकडे पाहिल्यावर पटदिशी त्यांचं नाव आठवण्याऐवजी, 'प्रमोद महाजनांची मुलगी', असं सर्वात आधी मनात येतं, त्या थोर युवा नेत्या पूनमताई महाजन यांच्याबद्दल फार आधीपासूनच माझ्या मनात सहानुभूती आहे. ही सहानुभूती अर्थात त्यांच्या अगाध ज्ञानाबद्दल आणि वैचारिक प्रगल्भतेबद्दल आहे. कारण त्यांचे ज्ञान आणि वैचारिक प्रगल्भता महान भाजपीय परंपरेला साजेशी अशीच आहे.
 
प्रभू रामचंद्र हे महाराष्ट्रात येणारे पहिले उत्तर भारतीय आहेत, या त्यांच्या नव्या संशोधनात्मक-विधानाची सोशल मीडियावर टिंगल होताना दिसली. खरेतर तशी टिंगल व्हायला नको. याचे कारण थोर युवा नेत्या पूनमताई महाजन यांच्या ज्ञानाची कवाडे कुट्ट अंधाराच्या दिशेने उघडतात, त्यामुळे त्यात त्यांचा काही दोष नाही. मात्र, त्यांच्या या अगाध ज्ञानाबद्दल चिंतित होण्याचे कारण म्हणजे, त्यांनी आपले हे ज्ञान सार्वजनिक न करता, लपवून ठेवून, त्यातील एक्सक्लूझिव्हनेस जपला पाहिजे. कारण त्यात अखंड हिंदू राष्ट्राचे हित आणि जगविख्यात पक्षोपयोगी स्वार्थ सामावलेले आहे.
 
या ताईंचे गेल्या वर्षीचे एक विधान असेच अति-प्रचंड ज्ञानाच्या अवकाशातून आले होते. मुंबईत आलेल्या शेतकऱ्यांच्या मोर्चातील शेतकऱ्यांना त्यांनी माओवादी म्हटले होते. अर्थात, इथेही ताईंचा काहीच दोष नव्हता. कारण आधी म्हटले ना, की या ताईंच्या ज्ञानाची कवाडे कुट्ट अंधाराच्या दिशेने उघडतात. सो, देअर इज अ प्रॉब्लेम.
 
मकरंद अनासपुरे यांच्या कुठल्याशा कार्यक्रमात पंकजा ताई आणि या महशय ताई आल्या होत्या. त्यावेळीही राहुल गांधी यांच्यावर उथळ टीका यांनी केली होती. मला तेव्हाही आश्चर्य वाटले नव्हते. उलट हसू आले की, ज्यांना एखादी लाट आल्याशिवाय निवडून येण्याची खात्री देता येत नाही, त्यांनी एखाद्या राष्ट्रीय पक्षाच्या नेत्यावर, ज्याने स्वतःचे नेतृत्व सिद्ध केले आहे, त्याच्यावर उथळ टीका करावी?!
 
घराणेशाहीचे समर्थन करताना एक मुद्दा मांडला जातो, तो म्हणजे, आपलं नेतृत्व सिद्ध करत असाल, तर घराणेशाहीची टीका थोडी बोथट होते. राहुल गांधी यांनी ते केले. या पूनमताईंनी काय केले? प्रमोद महाजन यांच्या सारख्या पहाडी नेतृत्वाला साजेसा एकतरी गुण यांच्यात आहे का? उथळ आणि असबंध बडबडत राहण्यापलिकडे काय आहे यांच्यात? जरी असे असंबंध बडबडणे पक्षीय संस्कृती असेल तरी.
   
माहीत नाही, पण या ताईंच्या बोलण्यात मला कायम अहंकार दिसतो. आमचं कुणी काही बिघडवू शकत नाही, असा टोन बोलण्यात जाणवतो. असो. खरंतर एवढ्या प्रतिभावान, प्रगल्भ आणि ज्ञानसंपन्न थोर युवा नेत्यावर बोलण्याएवढे आपले कर्तृत्व नाही, तरी थोडे धाडस केलेच.

No comments

Powered by Blogger.